Column Driekus van de Zoandweg: Burgemiester

Elburg/Oldebroek - Bartus was de veurige wéke oarig uut zien humeur, dat hep jullie kunnen lezen. Nou ja, niet alles, want wel de helfte van zien stukkien was zwart oaf ‘edruk. Temeenste in mien krante. Ik was d’r niet rouwig umme, want hij had weer van alles op mien àn te marken, zoveule hep ik d’r wel van begrepen.

‘t Is altied ‘t zelfde met Bartus. Um ‘t minste of geringste is meneer op de start ‘e trap. En overdrieven kan ‘e as de beste. Eerst zit ‘e te zeuren dat wie met de Poasen bie hum mutten kommen eten en as ik dan een stuk of tiene van dee kleine krieleigies noar binnen warke, begint ‘e mien in de krante uut te vétern. En veur wat betref dat gedoo over de nieje Elburgse burgemiester: ik magge doar toch zeke wel een mening over hebben? Een poppekaste is ‘t.

Woarumme zet ze niet gewoon een advertensie in disse krante, dat Elburgers -as ze doar zin in hep- kunt solliciteren? Want d’r is vaste wel een botbekkien, die doar geschik veur is. Dee vreemde snuiters van buutenoaf hè’j helemoale niet neudig. Ik zègge mar zó: eigen volk eers.

Nou ja, zee zeuk ‘t ook mar uut, doar in Elburg. Hier in Oosterwolde hep wie ‘t beter veur mekoare. Wie hebben een eigen gekeuzen burgemiester. Nanne Schoonhoven. Wie bint mar wat gek met hum. Een betere is d’r niet. En al is ‘e dan niet offiesjeel eerste burger van de gemeente, want dee zetelt in ‘t Oldebroekse gemeentehuus, d’r gebeurt hier niks zonder goedkeuring van Nanne.

Zee mut ‘t in de gemeenteroad ook niet in de kop hoalen umme Nanne tegen te warken, want dan bint de rapen goar. En met een kwoaie Nanne is ‘t slech kàrsen eten, reken mar.
Overigens mag ‘t van mien met gemak wel ‘s wat warmer worren. Ik hebbe lange genog achter ‘t glas en de geraniums ‘ezeten. Ik mut zunnewarmte op de botten hebben.